Bakı Mühəndislik Universiteti (BMU) Memarlıq və inşaat fakültəsinin Dizayn kafedrasında qış imtahan sessiyası çərçivəsində 3-cü kurs (ingilis dili) tələbələri üçün “Layihələndirmə 1” və “Modelləşdirmə 1” fənnləri üzrə imtahanlar keçirilib.

Nəzəriyyə ilə praktikanı birləşdirən və iki hissədən ibarət bu imtahanlar zamanı “Dizayn” (interyer dizaynı) ixtisasının tələbələri mənzillərin interyer dizayn layihəsini hazırlayıblar. Layihə işi Modern, Minimalizm, Loft və Neoklassik üsluba uyğun olaraq yerinə yetirilib. Fərqli formatda keçirilən imtahan prosesi tələbələrin dizayn sahəsində qazandıqları nəzəri bilikləri və praktiki bacarıqları uğurla nümayiş etdirmələrinə imkan yaradıb.

İmtahan komissiyası sonda tələbələrin layihələrini texniki, eləcə də yaradıcı aspektdən təhlil edib və təqdim olunan işlərə uyğun müvafiq qiymətləndirmə aparıb.

Qeyd edək ki, nəzəriyyə ilə praktikanı bir arada tutan belə imtahanlar tələbələrin yaradıcılıq potensialını inkişaf etdirməklə yanaşı, onların gələcəkdə peşəkar dizayner kimi fəaliyyət göstərmələri üçün möhkəm bünövrə formalaşdırır. 

İctimaiyyətlə əlaqələr şöbəsi