Bakı Mühəndislik Universitetinin (BMU) əməkdaşları və tələbələri Azərbaycan Milli Elmlər Akademiyasının (AMEA) müxbir üzvü, fizika-riyaziyyat elmləri doktoru, professor, Əməkdar müəllim Rəhim Hüseynovun 100 illik yubileyinə həsr olunmuş “Astrofiziki tədqiqatlara müasir baxış”  mövzusunda Respublika elmi konfransında fəal iştirak ediblər.

Konfransda  “Müşahidə astrofizikası”, “Nəzəri astrofizika və onun tətbiqi məsələləri” bölmələrinə ayrı-ayrı müəlliflər tərəfindən təqdim olunmuş elmi məruzələr dinlənilib.

Konfransa BMU-nun Fizika kafedrasının əməkdaşları prof. Vəli Hüseynov, baş müəllim Həzi Qasımov, Ləman Hacıyeva, Fidan Əmirova və universitetin 15 tələbəsi qatılıb.

H.Qasımov tədbirdə həmmüəlliflərlə birgə hazırladığı “Uran komet ailəsinin mənşəyinə dair”  və “11 illik Günəş fəallığı və kometlərdə anomal quyruqlar” adlı məruzələri ilə çıxış edib.    

Elmi konfransda, həmçinin “Elektronika mühəndisliyi” ixtisasının 2-ci kurs tələbələri Aydan Ağayeva, Hakim Musazadə, Şamil Məmmədov, “Elektrik mühəndisliyi” ixtisasının 2-ci kurs tələbəsi Kubra Kazımovanın “Maqnitləşmiş astrofiziki obyektlər yaxınlığında relikt antineytrino-elektronsəpilməsində elektronlar tərəfindən enerji itkisi”,  “Fizika müəllimliyi” ixtisasının 4-cü kurs tələbələri Əminə Həmidova, Nuray Əhmədli, Rəqsanə Şükürova, Yasəmən Turablı, Aytac Nuruyeva, Ayşəgül Nuriyevanın “Ağ cırtdanların yaxın ətrafı 100 QeV tərtibli enerjiyə malik neytrinoların mənbəyi kimi”, həmin ixtisasın 4-cü kurs tələbələri Afət Cəfərova, Aytac Əhmədova, Həyat Kərimova, Elnaz Cəbrayılovanın isə “ICECUBE detektorunda neytron ulduzlarının yuxarı ətrafından gələn antineytrinoların detektə olunmasının mümkünlüyü” mövzularında elmi məruzələri dinlənilib.

Mövzulara elmi rəhbərliyi BMU-nun Fizika kafedrasının professoru, AMEA-nın müxbir üzvü V.Hüseynov edib. 

“Nəzəri astrofizika və onun tətbiqi məsələləri” bölməsinə elmi iş tədqim etmiş 44 müəlliflin 18-i BMU-nu təmsil edib.

İctimaiyyətlə əlaqələr şöbəsi