Bakı Mühəndislik Universitetinin (BMU) Avtomatika, telekommunikasiya və energetika kafedrasının professoru, texnika elmləri doktoru İslam İslamovun “Modeling of Antenna and Waveguide Devices for Wireless and Satellite Communications Systems” (Naqilsiz və peyk rabitə sistemləri üçün antena və dalğaötürən qurğuların modelləşdirilməsi) adlı monoqrafiyası dünyanın ən nüfuzlu nəşriyyatlarından olan “Springer”də çap edilib.

Monoqrafiya mikrodalğalı radiotexniki, telekommunikasiya qurğularından olan müxtəlif konstruksiya və təyinatlı antena qurğu, o cümlədən sistemlərinin modelləşdirilməsi, dalğaötürən sistemlərin eksperimental tədqiqi məsələlərinə həsr olunub. Monoqrafiyada tədqiq olunan və modelləşdirilən antena qurğu və sistemləri, əsasən naqilsiz rabitə texnologiyalarında, peyk rabitəsində, 5G texnologiyasında, mobil rabitədə, o cümlədən hərbi rabitə texnikasında istifadə edilən sistemlərdir.

Elmi əsər radiotexnika, telekommunikasiya və hərbi rabitə vasitələri sahələrində təhsil alan tələbələr, o cümlədən mühəndis-texniki və elmi işçilər üçün nəzərdə tutulub.

Qeyd edək ki, monoqrafiya Azərbaycan üzrə bu sahədə “Springer” nəşriyyatında çap olunan ilk elmi əsərdir.

İctimaiyyətlə əlaqələr şöbəsi