Ethics committee

Etika Komitəsi BEU-da Sağlam Mühitin və Dayanıqlı İnkişafın Təmin Edilməsində Mühüm Rol Oynayır

Bakı Mühəndislik Universitetində (BEU) ali təhsil və elmi fəaliyyət sahəsində akademik dürüstlüyün, şəffaflığın və etik davranış prinsiplərinin təmin edilməsi məqsədilə Etika Komitəsi fəaliyyət göstərir. Universitetdə etik prinsiplərin qorunması və inkişaf etdirilməsində mühüm rol oynayan komitə sədr, sədr müavini və beş üzvdən ibarətdir.

Komitə elmi tədqiqatların, akademik fəaliyyətlərin və idarəetmə qərarlarının etik prinsiplərə uyğunluğunu təmin edir, potensial maraqlar toqquşmasının və etik pozuntuların qarşısının alınmasına nəzarət edir. Eyni zamanda, komitənin fəaliyyəti müəllimlərin, tədqiqatçıların və tələbələrin hüquqlarının qorunması, elmi nəticələrin obyektivliyinin və etibarlılığının artırılması baxımından mühüm mexanizm rolunu oynayır.

Bu struktur elmi tədqiqatlarda insan amilinin nəzərə alınmasını, məlumatların məxfiliyini və sosial məsuliyyəti təmin etməklə universitetin akademik nüfuzunun möhkəmləndirilməsinə və onun qlobal elmi məkana inteqrasiyasına töhfə verir.

Etika Komitəsinin mövcudluğu universitetin beynəlxalq akademik dəyərlərə sadiqliyini nümayiş etdirməklə yanaşı, ali təhsil prosesində etibarlı, sağlam və ədalətli mühitin formalaşdırılması üçün şərait yaradır. Bununla yanaşı, maarifləndirici tədbirlər vasitəsilə etik mədəniyyətin yüksəldilməsinə və universitet icmasında məsuliyyət hissinin gücləndirilməsinə xüsusi diqqət yetirilir.