Bakalavr Təhsili
2026/2027-ci tədris ili üçün Bakı Mühəndislik Universitetinin bakalavriat səviyyəsi üzrə qəbul planı (layihə)
Bakalavr hazırlığı ali təhsilin birinci səviyyəsidir və Azərbaycan Respublikasının Nazirlər Kabineti tərəfindən təsdiq edilmiş bakalavr ixtisaslarının (proqramlarının) təsnifatına uyğun müvafiq ixtisaslar üzrə genişprofilli mütəxəssis hazırlığının həyata keçirilməsini təmin edir.
Bakalavriat səviyyəsində əyani təhsilalma formasının tədrisə tam cəlb olunma (full-time) növü üzrə təhsilin normativ müddəti 4-5 ildir. Təhsilin normativ müddəti ayrı-ayrı ixtisasların təhsil proqramları ilə müəyyənləşdirilir.
Bakalavriat səviyyəsində əyani təhsilalma formasının tədrisə qismən cəlb olunma (part-time) növü üzrə isə təhsilin müddəti təhsilalanın fərdi tədris planına uyğun olaraq müəyyənləşdirilir.
Bakalavriatı bitirən məzunlara “bakalavr” ali peşə-ixtisas dərəcəsi verilir. Bakalavriat təhsili almış məzun elmi müəssisə və təşkilatlarda və ali təhsil müəssisələrində elmi-pedaqoji fəaliyyət istisna olmaqla, bütün digər sahələrdə əmək fəaliyyəti ilə məşğul ola bilər. Bu təhsil səviyyəsini bitirən şəxslər təhsillərini magistratura səviyyəsində davam etdirə bilərlər.
Valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər dövlət, bələdiyyə və özəl orta ixtisas təhsili müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödənilir. Valideynlərini itirmiş və valideyn himayəsindən məhrum olmuş uşaqlar övladlığa götürüldükdə də bu hüququ saxlayırlar.
Tədris ili, bir qayda olaraq, iki semestrdən (payız və yaz) ibarətdir. Bundan əlavə, yay tətili müddətində 6 (altı) həftədən çox olmayaraq, yay semestri də təşkil oluna bilər.
Əyani təhsil forması üzrə tədris ilinin müddəti 40 həftədir. Hər semestr 20 həftədən (o cümlədən 5 həftə imtahan sessiyası) ibarətdir. Tələbənin auditoriya və auditoriyadankənar həftəlik yükünün həcmi 45 saatdır. Bu zaman auditoriya saatları 30-dan çox olmamalıdır. Əyani təhsilalma formasının tədrisə tam cəlb olunma (full-time) növü üzrə məcburi auditoriya dərslərinin maksimal həcmi ayrı-ayrı ixtisaslar üzrə təhsil proqramları ilə, tədrisə qismən cəlb olunma (part-time) növü üzrə isə ayrı-ayrı ixtisaslar üzrə təhsil proqramları və təhsilalanın fərdi tədris planına uyğun olaraq müəyyənləşdirilir. Qiyabi təhsil forması üzrə isə tələbələrin auditoriya dərslərinin həcmi ildə 180-240 saat nəzərdə tutulur.
Tədris planının bütün şərtlərini yerinə yetirmiş, o cümlədən nəzərdə tutulmuş cari attestasiyalardan (fənlər üzrə attestasiyalardan) müvəffəqiyyətlə keçmiş tələbələr yekun dövlət attestasiyasına buraxılırlar. Yekun attestasiya ixtisas üzrə buraxılış yekun dövlət imtahanı (fənlərarası) və ya buraxılış işinin müdafiəsindən ibarətdir. Yekun attestasiyanın hazırlanmasına və təşkilinə ayrılan müddət 6 həftədir.
İxtisasın (ixtisaslaşmanın) təhsil müddətindən asılı olaraq, tələbələrə bakalavriat səviyyəsində 240-300 kredit müəyyənləşdirilir. İxtisaslar üzrə təhsil proqramlarında nəzərdə tutulmuş kreditləri toplayan tələbə həmin proqramı mənimsəmiş hesab edilir. Ali təhsil müəssisələrində bakalavriat səviyyəsinin tədris proqramı üzrə tədris planını tam yerinə yetirmiş şəxslərə yekun Dövlət Attestasiya Komissiyasının qərarı əsasında “bakalavr ” ali peşə-ixtisas dərəcəsi verilir.
Orta ixtisas təhsili müəssisələrini yüksək nəticələrlə başa vuran və “subbakalavr” dərəcəsi alan şəxslər bakalavr səviyyəsində təhsillərini davam etdirdikdə, orta ixtisas təhsili pilləsində müvafiq fənlər üzrə onların topladıqları kreditlər müəyyən olunmuş qaydada ali təhsil müəssisəsi tərəfindən nəzərə alınır.
| № | Kod | Qrup | İxtisas / Proqram | Azərbaycan Bölməsi Əyani | Azərbaycan Bölməsi Qiyabi | İngilis Bölməsi Əyani |
|---|---|---|---|---|---|---|
| 1 | 6002001 | III | Beynəlxalq münasibətlər | - | - | 25 |
| 2 | 6003003 | V | Dekorativ - tətbiqi sənət* (bədii keramika, şüşə, xalça, bədii toxuculuq) | 40 | - | - |
| 3 | 6003005 | V | Dizayn* (İnteyer dizaynı, qrafik dizayn, sənaye dizaynı, geyim dizaynı) | 120 | - | 15 |
| 4 | 6004001 | II | Beynəlxalq ticarət və logistika | 50 | 20 | - |
| 5 | 6004002 | II | Biznesin idarə edilməsi** | 60 | 30 | 25 |
| 6 | 6004003 | II | Dövlət və bələdiyyə idarəetməsi | 30 | 20 | - |
| 7 | 6004004 | II | İqtisadiyyat | 50 | 20 | 25 |
| 8 | 6004005 | II | Maliyyə | 75 | 20 | 25 |
| 9 | 6004006 | II | Marketinq | 70 | 30 | 25 |
| 10 | 6004008 | II | Mühasibat | 50 | 20 | 25 |
| 11 | 6005002 | I | Biotexnologiya**** | - | - | 25 |
| 12 | 6005002 | I | Biotexnologiya** | 50 | - | 30 |
| 13 | 6005005 | I | Fizika | 25 | - | 20 |
| 14 | 6005008 | I | Kimya** | 50 | - | 50 |
| 15 | 6005008 | I | Kimya**** | - | - | 25 |
| 16 | 6005009 | I | Kompüter elmləri (süni intellekt)**** | - | - | 25 |
| 17 | 6005009 | I | Kompüter elmləri | 60 | - | 30 |
| 18 | 6005009 | I | Kompüter elmləri*** | - | - | 26 |
| 19 | 6005011 | I | Riyaziyyat | - | - | 30 |
| 20 | 6006005 | I | Data analitikası | - | - | 30 |
| 21 | 6006005 | I | Data analitikası*** | - | - | 26 |
| 22 | 6006007 | I | Ekologiya mühəndisliyi | 60 | - | 30 |
| 23 | 6006008 | I | Elektrik və elektronika mühəndisliyi | 60 | - | 30 |
| 24 | 6006008 | I | Elektrik və elektronika mühəndisliyi*** | - | - | 26 |
| 25 | 6006009 | I | Energetika mühəndisliyi | 60 | - | - |
| 26 | 6006016 | I | İnformasiya texnologiyaları | 90 | 20 | 50 |
| 27 | 6006016 | I | İnformasiya texnologiyaları*** | - | - | 26 |
| 28 | 6006017 | I | İnformasiya təhlükəsizliyi | 60 | - | 25 |
| 29 | 6006018 | I | İnşaat mühəndisliyi | 30 | - | 20 |
| 30 | 6006020 | I | Kimya mühəndisliyi** | 50 | - | 50 |
| 31 | 6006021 | I | Kommunikasiya sistemləri mühəndisliyi | 25 | - | - |
| 32 | 6006022 | I | Kompüter mühəndisliyi** | 60 | - | 25 |
| 33 | 6006023 | I | Qida mühəndisliyi | 30 | - | - |
| 34 | 6006025 | I | Logistika və nəqliyyat texnologiyaları mühəndisliyi | 50 | - | 20 |
| 35 | 6006026 | I | Maşın mühəndisliyi | 25 | - | - |
| 36 | 6006028 | I | Mexanika mühəndisliyi**** | - | - | 25 |
| 37 | 6006028 | I | Mexanika mühəndisliyi** | 40 | - | 20 |
| 38 | 6006029 | I | Mexatronika və robototexnika mühəndisliyi | 50 | - | - |
| 39 | 6006031 | V | Memarlıq* | 60 | - | 20 |
| 40 | 6006036 | I | Nəqliyyat mühəndisliyi | 30 | - | - |
| 41 | 6006037 | I | Nəqliyyat tikintisi mühəndisliyi | 20 | - | - |
| 42 | 6006038 | I | Proqram təminatı mühəndisliyi | 30 | - | 30 |
| 43 | 6006039 | I | Proseslərin avtomatlaşdırılması mühəndisliyi | 30 | - | 30 |
| 44 | 6006040 | I | Radiotexnika və telekommunikasiya mühəndisliyi | 40 | - | - |
| 45 | 6006041 | I | Sənaye mühəndisliyi | 30 | - | 30 |
| 46 | 6006042 | V | Şəhərsalma | 15 | - | - |
| 47 | 6006043 | I | Şərabçılıq | 90 | 30 | - |
| 48 | 6006046 | II | Daşınmaz əmlakın idarəolunması | 30 | - | - |
| 49 | 6008005 | II | Nəqliyyatda servis (Avtomobil nəqliyyatı üzrə) | 40 | 20 | - |
| 50 | 6008008 | II | Turizm işinin təşkili | 60 | 20 | - |
| Cəmi | 1895 | 250 | 939 | |||
*Bu ixtisaslar üzrə qabiliyyət imtahanı nəzərdə tutulmamışdır.
**Bu ixtisaslara qəbul olunan tələbələr Bakı Mühəndislik Universiteti (BMU) ilə Çin Xalq Respublikasının Pekin Kimya Texnologiyaları Universiteti (PKTU) arasında ikili diplom proqramı çərçivəsində həyata keçirilən 2+2 modeli üzrə təhsil almaq imkanı əldə edirlər. Tələbələrin ilk 2 tədris ili ərzində akademik göstəriciləri nəzərə alınmaqla, hər ixtisas üzrə ümumi orta müvəffəqiyyət göstəriciləri (ÜOMG) 81 və daha yuxarı olan 15-dək tələbə PKTU-nun təqaüdü hesabına təhsilini PKTU-da davam etdirə bilər. ÜOMG-si 61–80 aralığında olan tələbələr isə PKTU-da təhsilini ödənişli əsaslarla davam etdirmək hüququna malikdirlər.
****Bu ixtisaslar üzrə tələbə qəbulu BMU–PKTU Mühəndislik Fakültəsinin ikili diplom proqramı çərçivəsində 3+1 modeli əsasında həyata keçirilir. Tələbələr təhsilin ilk 3 ilini BMU-da, sonuncu 1 ilini isə Pekin Kimya Texnologiyaları Universitetində davam etdirirlər. Proqram üzrə 3 tədris ilinin nəticələrinə əsasən, ÜOMG-si 91 və daha yuxarı olan tələbələr PKTU-nun təqaüdü hesabına 4-cü kursu PKTU-da təhsil alırlar. ÜOMG-si 71–90 aralığında olan tələbələr isə 4-cü kursu PKTU-da ödənişli əsaslarla davam etdirə bilərlər. Qeyd olunan akademik tələbləri yerinə yetirə bilməyən və PKTU-da təhsilini davam etdirmək istəməyən tələbələrin təhsili müvafiq qaydalara uyğun olaraq BMU-da davam etdiriləcək.
Qeyd: İngilis dilli ixtisaslarda müsabiqə Azərbaycan və rus bölmələri üzrə birgə aparılır.