“Azərbaycanda Rektorlar Konfransının yaradılması” (ECAR) layihəsi çərçivəsində fəaliyyət göstərən komitələrin idarə heyəti üzvlərinin növbəti işgüzar görüşü baş tutub.

Görüşdə Bakı Mühəndislik Universitetinin, Bakı Biznes Universitetinin, Azərbaycan Dövlət Pedaqoji Universitetinin, Azərbaycan Texniki Universitetinin, Azərbaycan Turizm və Menecment Univeristetinin, Bakı Avrasiya Universitetinin, Azərbaycan Dillər Univeristetinin prorektorları və məsul şəxsləri iştirak ediblər.

Tədbirin məqsədi layihə çərçivəsində təsis ediləcək dövri jurnalın adının, məzmunun, redaksiya heyətinin, nəşr tarixinin və digər mühüm nüansların müəyyən edilməsi olub. Jurnal ECAR lahiyəsinə üzv olan ali təhsil müəssisələrinin uğurlu fəaliyyətləri, qarşılaşdıqları problemlər, əməkdaşlarının uğur hekayələri və layihə müddətində yaradılmış komitələrin fəaliyyət və tədqiqatlarının nəticələri haqqında məlumatların ictimaiyyətlə mütəmadi olaraq paylaşılmasını nəzərdə tutur.

Jurnalın hazırlanması və bu sahədə Avropa təcrübəsinin öyrənilməsi məqsədi ilə layihə heyətinin 3-7 iyul tarixlərində Belçikanın  Brussel şəhərinə səfəri planlaşdırılır. Səfər zamanı EFMD - Avropa İdarəetmə İnkişafı Fondu, EUA- Avropa Universitlər Birliyi, ESU- Avropa Tələbələr Birliyi, VLİR və CreF Belçika rektorlar konfranslarının dövri jurnallarının redaksiya heyəti ilə görüşlər təşkil olunacaqdır.   

İctimaiyyətlə əlaqələr şöbəsi