Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin İdarə Heyətinin sədri Mustafa Abbasbəyli və agentliyin əməkdaşları Bakı Mühəndislik Universitetində (BMU) olub.

Agentliyin rəhbər heyəti universitetin kampusu, Texnoparkı, mexanika, kimya, elektronika və İKT laboratoriyaları, eləcə də yataqxanasını gəziblər, mövcud şəraitlə yaxından maraqlanıblar.

BMU-nun rektoru Yaqub Piriyev universitetin müasir laboratoriyalarının geniş imkanları, burada aparılan elmi tədqiqatlar, həmçinin ali təhsil ocağının Texnoparkında tələbələrin innovativ təşəbbüslərinin, startaplarının reallaşdırılması məqsədilə həyata keçirilən işlər barədə ətraflı məlumat verib. Planlaşdırılan yeniliklər, açılacaq yeni ixtisaslar haqda da danışan rektor, eyni zamanda, əmək bazarı üçün lazımi mütəxəssislərin hazırlanması, universitet-sənaye iş birliyinin inkişafı, məzunların məşğulluq səviyyəsinin yüksəldilməsi yönündə universitetdə görülən tədbirləri vurğulayıb.

Ali təhsil ocağı ilə tanışlıq zamanı tələbə və məzunların məşğulluq məsələləri, onların ixtisaslarına uyğun işlə təmin olunması istiqamətində əməkdaşlıq, Dövlət Məşğulluq Agentliyinin son illər bu yöndə tətbiq etdiyi  müasir, yeni yanaşmalar nəzərdən keçirilb. Bununla yanaşı, tələbələrin biznes bacarıqlarının inkişaf etdirilməsi, universitetdə hazırda mövcud olan startaplar və inkubasiya mərkəzi, birgə innovativ layihələrlə bağlı geniş fikir mübadiləsi aparılıb.

Mustafa Abbasbəyli BMU-nun geniş potensiala malik olduğunu bildirib, müsbət təəssüratlarını paylaşıb və gələcək əməkdaşlığın mümkün istiqamətləri barədə fikirlərini nəzərə çatdırıb.

İctimaiyyətlə əlaqələr şöbəsi