Azərbaycan Respublikası Elm və Təhsil Nazirliyi və Bakı Mühəndislik Universitetinin (BMU) birgə təşkilatçılığı ilə Ümummilli Lider Heydər Əliyevin anadan olmasının 100-cü ildönümünə həsr olunmuș “İqtisadiyyat və idarəetmədə davamlı inkişaf: Problemlər və perspektivlər” adlı III beynəlxalq elmi-praktiki konfrans öz işinə başlayıb.

Tədbirdə öncə Dövlət Himni səsləndirilib, Ulu Öndər Heydər Əliyevin və torpaqlarımızın ərazi bütövlüyü yolunda canından keçən şəhidlərin əziz xatirəsi bir dəqiqəlik sükutla yad edilib.

Açılış nitqi ilə çıxış edən BMU-nun elm və innovasiya məsələləri üzrə prorektoru Ağası Məlikov qonaqları universitet rəhbərliyi adından salamlayıb. Ulu Öndərin anadan olmasının 100-cü ildönümünə təsadüf edən konfransın Azərbaycan dövlətinin suverenliyinin tam bərpasının reallaşdığı bir vaxtda keçirildiyini önə çəkən prorektor bu tarixi gerçəkliyin tədbirin mövzusunun, müzakirə olunacaq məsələlərin əhəmiyyətini bir qədər də artırdığını vurğulayıb. Prorektor çıxışında Azərbaycanın müstəqilliyinin ilk illərində baş verən prosesləri xatırladıb və Ümummilli Lider Heydər Əliyevin xalqın təkidi ilə ölkə rəhbərliyinə qayıdışından sonra bütün sahələrdə əsaslı dönüşün yarandığını, ölkənin davamlı inkişaf yoluna qədəm qoyduğunu bildirib.

Prezident İlham Əliyevin rəhbərliyi altında möhkəm iqtisadi zəminə əsaslanan uğurlu iqtisadi siyasətin həyata keçirildiyini deyən prorektor vurğulayıb ki, bu siyasətin diqqət mərkəzində təkcə daxili bazarda deyil, həm də beynəlxalq arenada ölkənin rəqabət üstünlüyünü təmin edən strateji qərarlar durur.

Ağası Məlikov hazırda Böyük Qayıdış konsepsiyasının ilk mərhələsinin gerçəkləşməsinin mühüm hadisə olduğunu, azadlığa qovuşmuş torpaqlarda quruculuq və inkişaf dövrünün başlandığını qeyd edib. Bildirib ki, bu dövrdə elm adamlarının qarşısında duran əsas məsələ yeni çağırışlara uyğun elmi tədqiqatlar aparmaq, müzakirələr təşkil etmək və ölkənin inkişafına öz bilik və bacarıqları ilə elmi yöndən dəstək verməkdən ibarətdir. Bügünkü tədbirin məhz bu amala xidmət etdiyini söyləyən prorektor konfransa ABŞ, İtaliya, Portuqaliya, Rumıniya, Ukrayna, Cənubi Koreya, Türkiyə və Azərbaycandan ümumilikdə 130-a yaxın məqalənin göndərildiyini nəzərə çatdırıb. Onlardan 93-ü elmi heyət tərəfindən qəbul olunub və konfransın proqramına daxil edilib. Konfrasda Azərbaycanın 18 fərqli ali təhsil müəssisəsinin əməkdaşları tərəfindən məruzələr təqdim ediləcəyini söyləyən prorektor bunu konfransa böyük marağın göstəricisi kimi qiymətləndirib, tədbirin işinə uğurlar arzulayıb.

Sonra İqtisadiyyat Nazirliyinin Dayanıqlı inkişaf və sosial siyasət şöbəsinin müdiri Hüseyn Hüseynov çıxış edərək konfransın aktual mövzuya həsr olunduğunu deyib və bu gün bəşəriyyəti düşündürən müxtəlif risklərdən danışıb. Şöbə müdiri qlobal müstəvidə baş vermiş risklərin Azərbaycan iqtisadiyyatına neqativ təsirlərinin neytrallaşdırılması, tənzimlənməsi ilə bağlı görülən uğurlu tədbirlərə, doqquz aylıq nəticələrə əsasən müsbət iqtisadi artım tempinin qorunub saxlanmasına diqqət çəkib. Müsbət iqtisadi artım və iqtisadi aktivliyin qorunması üçün vacib şərtlərdən birinin ölkənin orta və uzunmüddətli dövrdə baxışının formalaşdırılması olduğunu deyən nazirlik rəsmisi 2030-cu ilə qədər dövrü əhatə edən beş milli prioritetdən, onların əsas istiqamətlərindən ətraflı söz açıb. Bu baxımdan Azərbaycanın yaşıl enerji məkanına çevrilməklə bağlı kifayət qədər ciddi hədəflərin götürüldüyünü, ölkə Prezidentinin  müvafiq sərəncamına əsasən Qarabağın enerji zonası elan olunduğunu xüsusi vurğulayıb, əsas hədəflərə toxunub.

Çıxışında dayanıqlı inkişafın təmin olunması üçün qarşıda duran vəzifələri nəzərə çatdıran Hüseyn Hüseynov iqtisadi, sosial və ətraf mühit məsələlərinə vahid baxışın formalaşdırılmasının və onların bir-biri ilə sinxron şəkildə irəliləməsinin vacibliyini bildirib. O, konfransda buna dair məsələlərin geniş müzakirə olunacağına, dayanıqlı inkişafın həm iqtisadi, həm sosial, həm də ekoloji aspektlərinin diqqətdə saxlanılacağına, eyni zamanda karbon vergisi və karbon vahidlərinin ölkə iqtisadiyyatlarına təsiri ilə bağlı aktual məsələlərə dair elmi ictimaiyyət tərəfindən təkliflər səslənəcəyinə ümid etdiyini deyib.

Sonra plenar iclasda BMU-nun dosenti Elçin Süleymanovun “Azərbaycanda dünya səviyyəli universitet quruculuğunun ali təhsildə rəqabətqabiliyyətliliyə təsiri”, Taras Şevçenko adına Kiyev Milli Universitetinin tədqiqatçısı Olqa Matiuşynanın “İqlim dəyişikliyí ilə mübarizə üzrə dövlətlərin əməkdaşlığının hüquqi tənzimlənməsi”, UNEC-in Beynəlxalq iqtisadiyyat və biznes kafedrasının müdiri Xətai Alıyevin “Azərbaycanda universitet-dövlət-sənaye əlaqələrinə institutsional baxış: Nəyi necə etməli?” mövzularında məruzələri dinlənilib.

Ardınca plenar iclasda çıxış edənlərə sertifikatlar təqdim olunub.  

Fasilədən sonra konfrans öz işini ayrı-ayrı seksiyalarda davam etdirib.

İctimaiyyətlə əlaqələr şöbəsi