Mən, Mütəllim Ramiz oğlu Şərifli, 08 may 1958-ci il tarixində Bakı şəhərinin Yasamal (keçmiş Oktyabr) rayonunda anadan olmuşam. Milliyyətcə türkəm (Azərbaycan türküyəm). 1965-1975-ci illərdə Bakı şəhərinin 20 nömrəli orta məktəbinin rus bölməsində təhsil almışam. 1975-1980-ci illərdə BDU-nun (keçmiş ADU-nun) Tətbiqi Riyaziyyat fakültəsində Ali təhsil alıb oranı fərqlənmə diplomu ilə bitirmişəm. 1980-1983-cü illərdə BDU-nun Aspiranturasının əyani şöbəsində təhsil almışam. Qeyd edim ki, Aspiranturanın əyani şöbəsinə iş stajım olmadan birbaşa Təhsil Nazirliyinin icazəsi ilə fəhlə ailəsində doğulduğum üçün qəbul imtahanlarına buraxılmışdım. 1984-cü ilin martın 14-də Namizədlik disertasiyasını müdafiə edib Fizika-Riyaziyyat Elmləri Namizədi elmi dərəcəsinə layiq görülmüşəm. 1994-cü ildə isə Dosent elmi adını almışam. Müxtəlif ali məktəblərdə 3 dildə (Azərbaycan, rus və ingilis dillərində) dərs demişəm: Bakı Dövlət Universitetində, Azərbaycan Memarlıq-İnşaat Universitetində, Moskva Dövlət Açıq Universitetinin Bakı filialında, Azərbaycan Kooperasiya Universitetində, Bakı Mühəndislik (keçmiş Qafqaz) Universitetində, Azərbaycan Dövlət İqtisad Universitetində (UNEC-də) və Dövlət Gömrük Komitəsinin Akademiyasında. Ali məktəblərdə Pedaqoji stajım 1982-ci ildən başlayır. Uzun müddət Moskva Dövlət Açıq Universitetində və Azərbaycan Kooperasiya Universitetində Kafedra müdiri işləmişəm. Dövlət İmtahan Mərkəzi ilə sıx əməkdaşlıq edirəm, orada Fizika və Riyaziyyat fənləri üzrə ekspertəm, dəfələrlə qəbul və buraxılış imtahanları ilə bağlı bunkerdə qalmışam. Bir müddət Təhsil Nazirliyində Fizika fənninin dərslikləri üzrə Monitorinq qrupunun üzvü olmuşam. Evliyəm, 2 oğlum var.