Bakı Mühəndislik Universiteti ilə Cənubi Koreyanın İNHA Universiteti arasında icra olunan ikili diplom proqramı

(BAKALAVRİAT SƏVİYYƏSİ ÜZRƏ)

Bakı Mühəndislik Universiteti (BMU) ilə Cənubi Koreyanın İNHA Universiteti arasında bakalavriat səviyyəsində mühəndislik ixtisasları istiqaməti üzrə ikili diplom proqramı 2020/2021-ci tədris ilindən həyata keçirilir.

Proqram məzunları sahib olacaq:

  • 4 il – 2 diplom;
  • Tam təqaüdlü beynəlxalq keyfiyyətli təhsil;
  • 3 il – Azərbaycanda, 1 il – Cənubi Koreyada təhsil;
  • Cənubi Koreyada 3 həftəlik yay məktəbində iştirak;
  • Dünyaca məşhur Samsung, LG, Hyundai, Kia kimi məşhur şirkətlərə ziyarət;
  • Çoxdilli tədris mühiti (ingilis dilində mühəndislik ixtisası ilə paralel olaraq Koreya dilinin tədrisi);
  • Seçilmiş yerli və xarici universitetlərin professor-müəllim heyəti ilə tədris imkanı;
  • Magistratura və doktorantura təhsillərini Cənubi Koreyada təqaüdlə davam etdirmək imkanı;
  • Beynəlxalq təcrübəni öyrənərək, qeyd olunan mühəndislik sahələrində müasir bilik və bacarıqlara yiyələnmək imkanı;
  • Dünya səviyyəli uğurlu mütəxəssis olmaq imkanı;
  • Azərbaycanda və dünyanın istənilən nöqtəsində işlə təminat imkanları.

“2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” (bundan sonra Dövlət Proqramı) çərçivəsində 2022/2023-cü tədris ili üçün BMU ilə Cənubi Koreyanın İNHA Universiteti arasında ikili diplom proqramı üzrə İnformasiya texnologiyaları, İnşaat mühəndisliyi, Elektrik mühəndisliyi və Elektronika mühəndisliyi ixtisasları üzrə sənəd qəbulu həyata keçirilir. Proqramda Dövlət İmtahan Mərkəzinin (DİM) təşkil etdiyi imtahanda hər ixtisas üzrə müəyyən edilmiş müvafiq keçid bal toplayan, Azərbaycan Respublikasının vətəndaşı olan abituriyentlər iştirak edə bilər. BMU ilə İNHA Universitetinin birgə təşkil etdiyi müsabiqədən uğurla keçən və qəbul olan abituriyentlər ikili diplom proqramı çərçivəsində qeyd olunan 4 ixtisasdan birində öz seçimlərinə görə dövlət sifarişi əsasında təhsil ala biləcəklər.

İxtisaslar:

  1. İnformasiya texnologiyaları (keçid balı - 500);
  2. İnşaat mühəndisliyi (keçid balı - 400);
  3. Elektrik mühəndisliyi (keçid balı - 400);
  4. Elektronika mühəndisliyi (keçid balı - 400);
Kvota: 128 yer (hər ixtisas üzrə 32 nəfər)
Proqramın modeli: 3 il – Azərbaycanda, 1 il – Cənubi Koreyada.

Proqram 3+1 modeli əsasında qurulmuşdur. Belə ki, ikili diplom proqramına əsasən tələbələr 3 akademik ili BMU-da, 1 akademik ili (sonuncu kursu) isə Cənubi Koreyanın İNHA Universitetində təhsil alacaqlar. 4 ilin sonunda tələbələr iki diplom əldə edəcəklər. Cari proqram 4 il ərzində tam olaraq dövlət vəsaiti hesabına təmin olunur. Proqram çərçivəsində tələbələrin 1-ci kursun sonunda Cənubi Koreyada 3 həftəlik yay məktəbində iştirakı da nəzərdə tutulub. Bundan əlavə bakalavriat səviyyəsini bitirən tələbələr magistratura və doktorantura təhsillərini Cənubi Koreyada təqaüdlə davam etdirmək imkanına malik olacaqlar.

Tədris dili:

BMU-da 3 il müddətində ingilis dili (bəzi fənlər Azərbaycan dilində olmaqla), İNHA Universitetində isə 1 il müddətində Koreya dili.Tələbələrə BMU-da 3 illik təhsil müddəti ərzində müvafiq dil bacarıqlarını formalaşdırmaq üçün proqramın şərti olan Koreya dili dərsləri tədris olunacaq və onlar müvafiq olaraq “TOPİK” sertifikatı əldə etmək üçün 2-ci və 3-cü təhsil illərində imtahanlarda iştirak edəcəklər. İmtahanlardan uğurla keçmiş tələbələr 4-cü akademik ildə təhsillərini Cənubi Koreyanın İNHA Universitetində Koreya dilində davam etdirəcəklər.

Təhsil alanların maliyyə xərcləri:

Dövlət Proqramı tərəfindən qarşılanan xərclər aşağıdakılardır
  • 4 illik tam təhsil haqqı;
  • Cənubi Koreyada 1 illik təhsil xərcləri (4-cü kurs);
  • Cənubi Koreyada 3 həftəlik yay məktəbində iştirak xərcləri;
  • Tədris materialları və elektron informasiya resurslarına çıxış xərcləri;
  • Qeydiyyat xərci.

Qəbul şərtləri:

  1. Proqramda Azərbaycan Respublikasının vətəndaşı olan və Dövlət İmtahan Mərkəzinin (DİM) imtahanlarında iştirak etmiş və uğurla keçən 1-ci ixtisas qrupunun abituriyentləri və BMU-İNHA İDP-nin hər ixtisas üzrə müəyyən edilmiş müvafiq keçid balını toplamış namizədlər iştirak edə bilər;
  2. Proqrama müraciət etmiş namizədlər BMU ilə İNHA Universitetinin birgə təşkil etdiyi daxili imtahandan uğurla keçməlidirlər. Daxili imtahan (Fizika, Riyaziyyat və İngilis dili fənnlərindən) yazılı formada  BMU-da həyata keçirilir.
  3. 2022/2023-cü tədris ili qəbuluna dair əsas tarixlər:
  • Onlayn qeydiyyat: 6 iyun - 10 avqust 2022-ci il
  • BMU-İNHA İDP daxili imtahan:
    • 13 avqust 2022-ci il - Məlumat günü
    • 14 avqust 2022-ci il - Yazılı imtahan (Fizika, Riyaziyyat və İngilis dili)
  • Nəticələrin elanı:19 avqust 2022-ci il

Tələb olunan sənədlər:

Daxili imtahanda iştirak etmək üçün “onlayn müraciət formasını” dolduraraq tələb olunan sənədləri təqdim etmək lazımdır:

  • Şəxsiyyət vəsiqəsinin surəti;
  • 3.5x4.5 ölçüdə rəngli fotoşəkil;
  • DİM tərəfindən keçirilmiş hər iki imtahanda topladığı balı təsdiq edən rəsmi sənəd;
  • Məktəb attestatının ingilis dilində tərcüməsi və notarial təsdiqi (attestatını almayan tələbələr təhsil aldıqları orta məktəbdən imzalı və möhürlü arayış təqdim etməlidir);
  • İngilis dili sertifikatı (olduğu təqdirdə): İELTS 5.5, TOEFL İBT 71 və ya Duolingo 90
Qeyd 1: İngilis dili sertifikatı təqdim edən namizədlər ingilis dili yazılı imtahanından azad olunur.
Qeyd 2: Proqrama qeydiyyat zamanı namizəd buraxılış iş nömrəsi (300 ballıq imtahan), blok imtahanı iş nömrəsi (400 ballııq imtahan) və şəxsi kabinetin istifadəçi adını (FİN) təqdim etməli olacaqdır.
Cənubi Koreyanın İNHA Universiteti haqqında:

Universitet mühəndislik, biznes inzibatçılığı, tibb, sosial elmlər sahəsində Cənubi Koreyanın lider universitetlərindən biridir. İNHA Universitetində 73 ixtisasın 26-si mühəndislik ixtisası üzrədir. Reytinqə görə Cənubi Koreyada 189 universitetdən 8-ci yerdədir (2019-cu il). İNHA Universiteti müxtəlif tədqiqatlar aparan, dünyanın bir çox nüfuzlu ali təhsil müəssisələri ilə əlaqələri olan və 20 mindən çox tələbəsi olan ali təhsil ocağıdır. Məzunların işə düzəlmə reytinqinə görə Cənubi Koreya universitetləri arasında 3-cü yerdədir, müvafiq olaraq hər il İNHA universitetinin 70% məzunu işlə təmin olunur (2019-cu il).

İkili Diplom Proqramı və İNHA Universiteti haqqında daha ətraflı məlumat əldə etmək üçün təqdim olunan linklərə baxa bilərsiniz:

BMU-İNHA ikili diplom proqramı ilə əlaqədar sualları e-mail ünvanına, proqramın rəsmi feysbuk səhifəsinə ünvanlamaq və ya əlaqə nömrələrinə zəng vurmaq mümkündür.