Tədrisin təşkili ilə yanaşı, müxtəlif istiqamətlərdə elmi-tədqiqat işlərinin aparılmasını diqqət mərkəzində saxlayan Bakı Mühəndislik Universitetinin (BMU) Fizika kafedrasının əməkdaşları ümummilli lider Heydər Əliyevin anadan olmasının 99-cu ildönümünə həsr olunmuş “Gənc tədqiqatçıların VI beynəlxalq elmi konfransı”nda yaxından iştirak ediblər. Eyni zamanda, kafedranın bütün əməkdaşlarının tədqiqat işləri konfrans materialları toplusunda dərc olunub.

İkigünlük konfrans (29-30 aprel) BMU və Dövlət Gömrük Komitəsinin Akademiyasının birgə təşkilatçılığı ilə keçirilib. Ümumilikdə konfransa 950-yə yaxın məqalə daxil olub və anonim rəyçilər tərəfindən 585 ən yaxşı məqalə qəbul edilib.

Konfransın plenar iclasında adıçəkilən kafedranın dosenti Ülkər Abdurəhmanova “A^III B^III C₂^VI tip üçqat birləşmələrin bəzi nümayəndələrinin xüsusiyyətləri” mövzusunda məruzə ilə çıxış edib.

Bundan başqa, kafedranın dosentləri Fəridə Nurməmmədova və Qaçay Nəcəfovun təqdim etdikləri tezislər maraqla dinlənilib.

Elmi-tədqiqat işlərində Fizika ixtisasının tələbələrinin aktivliyi də xüsusi nəzərə çarpıb. Belə ki, konfransın bölmələrində III kurs bakalavr tələbələri-Vüsalə İmamquliyeva, Arzu Alxanova, Rauf Məhəmmədov və İdris Məmmədov “Günəş fəallığının 23-cü və 24-cü dövrlərində aşkar olunan parabolik kometlər”, Ləman Hacıyeva “Neytrino kütləsinin təbiəti”, Sənəm İmanova isə “Yüksək sıxlıqlı polietilen-keramika kompozit sisteminin impedans spektroskopiya üsulu ilə tədqiqi” mövzularında uğurla çıxış ediblər. Onlar elmi-tədqiqat işlərini kafedranın əməkdaşları – professor Vəli Hüseynov, Həzi Qasımov və Nərgiz Mehdiyevanın rəhbərliyi altında aparıblar.  

İctimaiyyətlə əlaqələr şöbəsi