Bakı Mühəndislik Universitetində (BMU) “Rəsmi və elmi üslublarda dilimizin tətbiqi: uğurlarımız və problemlərimiz” mövzusunda elmi-nəzəri seminar keçirilib.

BMU-nun Azərbaycan dili və pedaqogika kafedrasının təşkilatçılığı ilə baş tutan tədbirdə Dövlət Dil Komissiyası yanında Monitorinq Mərkəzinin rəhbər heyəti, həmçinin universitetin müəllim və tələbələri iştirak ediblər.

Seminarda BMU-nun elmi işlər üzrə prorektoru Elçin Süleymanov mövzunun aktuallığına toxunaraq, Azərbaycan dilinin saflığının qorunması, dövlət dilindən istifadənin təmin olunması, dilçiliyin inkişaf etdirilməsi və digər məsələlər haqda danışıb.

Adıçəkilən kafedranın müdiri Təranə Hacıyeva müstəqilliyimiizn bərpasından sonra dilimizin daha da inkişaf etdirilməsi üçün geniş imkanların yaradıldığını, ana dilimizin dövlət dili kimi təsbit olunduğunu bildirib. Kafedra müdiri, eyni zamanda dövlət dilinin tətbiqi işinin təkmilləşdirilməsi prosesinin sürətləndirildiyini söyləyib və bu aspektdə gerçəkləşdirilən mühüm tədbirləri diqqətə çatdırıb.

Dövlət Dil Komissiyası yanında Monitorinq Mərkəzinin direktoru Sevinc Əliyeva ali təhsil müəssisələri arasında belə bir görüşün ilk dəfə BMU-da təşkil olunduğunu önə çəkib və bunun davamlı olacağına ümid etdiyini vurğulayıb. Rəhbərlik etdiyi qurumun yaranma tarixi və fəaliyyət istiqamətləri barədə ətraflı danışan S.Əliyeva Mərkəzin son dövrlərdə həyata keçirdiyi işləri qeyd edib.

Sonra seminarda ana dilinə verilən dəyər, dilimizin zənginliyi və saflığınin qorunması, ədəbi dilin düzgün istifadəsi, dil və nitq mədəniyyətinin yüksəldilməsi, dilin ifadə üslubları, dil normalarına riayət olunması, sahəvi, eləcə də beynəlxalq terminlərin istifadəsi haqda geniş fikir mübadiləsi aparılıb. Müzakirələr zamanı tərcümə və dublyaj sahəsində rast gəlinən ciddi xətalar, internet resurslarında, mətbu orqanlarda yol verilən yanlışlıqlar, eləcə də dilimizin qorunması və inkişafına xidmət edə biləcək maraqlı nüanslar üzərində dayanılıb, problemlərin həlli istiqamətində müxtəlif təkiflər səsləndirilib.

BMU-nun Pedaqoji fakültəsinin İngilis dili kafedrasının müdiri Nərminə Əliyeva, Fizika kafedrasının müdiri Razim Bayramlı, Azərbaycan dili və pedaqogika kafedrasının əməkdaşı Zabitə Teymurlu və digərləri çıxış edərək, tədris mühitində dilin qorunması ilə bağlı tətbiq olunan tapşırıqlar və nəticələr haqda danışıb, rəy və təkliflərini bildiriblər.

Seminarın sonunda Dövlət Dil Komissiyası yanında Monitorinq Mərkəzinin əməkdaşlarına BMU adından təşəkkürnamələr təqdim edilib.

İctimaiyyətlə əlaqələr şöbəsi