Bakı Mühəndislik Universiteti (BMU) ilə Daşkənd İNHA Universiteti arasında əməkdaşlq haqqında saziş imzalanıb.

Sənədi BMU-nun rektoru, professor Havar Məmmədov və Daşkənd İNHA Universitetinin rektoru Müzəffər Cəlalov imzalayıb.

Saziş təhsil və elmi-tədqiqat sahəsində qarşılıqlı əməkdaşlığın təşviqini, eyni zamanda tələbə, professor-müəllim heyəti üçün təhsil və elmi-tədqiqat, eləcə də mədəniyyət sahəsində təcrübə mübadiləsinin aparılmasına dəstək verilməsini nəzərdə tutur.

İmzalanma mərasimində rektor Havar Məmmədov Azərbaycan ilə Özbəkistan arasında dərin kökləri olan dostluq münasibətlərinin ölkə rəhbərləri - Prezident İlham Əliyev və Prezident Şavkat Mirziyoyevin  siyasi iradəsi ilə yeni inkişaf tempinə qədəm qoyduğunu, bu əlaqələrin perspektivli olan bir çox istiqamətlərlə yanaşı, ali təhsil sahəsində də inkişaf etdirilməsi üçün geniş potensialın olduğunu vurğulayıb.

Bakalavriat səviyyəsində mühəndislik ixtisasları istiqaməti üzrə BMU ilə Koreyanın İNHA Universitetinin 2020/2021-ci tədris ilindən birgə həyata keçirdiyi ikili diplom proqramının (İDP) icra vəziyyətindən danışan rektor bu proqramın “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın tərkib hissəsi olduğunu diqqətə çatdırıb. İDP çərçivəsində cari tədris ilində İnformasiya texnologiyaları, İnşaat mühəndisliyi, Elektrik mühəndisliyi və Elektronika mühəndisliyi ixtisasları üzrə qəbulun uğurlu nəticələrini qonaqla paylaşan rektor qeyd edib ki, İDP-yə qəbul olunaraq tələbə adı qazananların 50 nəfəri 500, 49 nəfəri isə 600 baldan çox nəticə göstərmiş abituriyentlərdir.

Daşkənd İNHA Universitetinin rektoru Müzəffər Cəlalov universitetin tarixi, tədris proqramları haqda məlumat verib. Bildirib ki, rəhbərlik etdiyi universitetdə hazırda bakalavr pilləsi üzrə iki fakültədə (Kompüter və proqram mühəndisliyi; Biznes və logistika), magistratura pilləsində isə “Rəqəmsal transformasiyada MBA” proqramı üzrə kadr hazırlığı aparılır, hər iki pillə üzrə məzunlara proqramları uğurlu başa vurduqdan sonra INHA Universitetinin diplomu verilir. Daşkənd İNHA Universitetində DATA mərkəz, İT Akademiyanın fəaliyyət göstərdiyini də vurğulayan M.Cəlalov gələcək əməkdaşlıq əlaqələrinin qurulmasına göstərdikləri maraqdan, bu münasibətlərin inkişaf etdirilməsinin tərəflər üçün əhəmiyyəti və faydalarından söz açıb.

Tədbirdə universitetlər arasında əməkdaşlıq əlaqələrinin qurulması və gücləndirilməsi, o cümlədən tələbə mübadiləsinin təşkili, tədris prosesinə qarşılıqlı professor-müəllim heyətinin cəlbi, faydalı təcrübələrin bölüşdürülməsi imkanları geniş müzakirə edilib.

Sonda qarşılıqlı xatirə hədiyyələri təqdim olunub.

İctimaiyyətlə əlaqələr şöbəsi