Bakı Mühəndislik Universitetinin (BMU) kampusunda həyata keçirilən abadlıq və infrastrukturun yenilənməsi işləri çərçivəsində yeni səkilərin salınması, həmçinin asfaltlama prosesi aparılıb. Tələbələr, müəllim heyəti və digər kampus istifadəçiləri üçün daha rahat, təhlükəsiz və müasir mühitin yaradılması məqsədilə davam etdirilən işlərə uyğun olaraq BMU Texnoprakının ətrafına yeni asfalt örtüyü çəkilib, yol infrastrukturu tam yenilənib.

Bundan başqa, piyada hərəkəti üçün nəzərdə tutulan sahələrdə yeni səkilər salınıb, mövcud səkilər genişləndirilərək yeni daş örtüyü döşənib.

Hərəkət rahatlığının artırılması, təhlükəsizlik səviyyəsinin yüksəldilməsi, sağlam və ekoloji mühitin formalaşması işləri çərçivəsində kampusda ilk dəfə yeni velosiped zolaqlarının salınması, müvafiq dayanacaqların yaradılması işləri də aparılır. Kampus daxilində ekoloji cəhətdən təmiz nəqliyyat vasitələrindən istifadənin təşviqinə xidmət edən bu prosesin yaxın zamanlarda tam yekunlaşması nəzərdə tutulur.

İctimaiyyətlə əlaqələr şöbəsi